ATUR PAMBAGYA HARJA
Bismillahir rohmaanir rohiim
Assalamu’alaikum Wr.Wb
Kawilujengan, kasarasan tuwin sih wilasaning Gusti ingkang Maha suci, mugi tansah kajiwa kasalira dhuamteng sagung para lenggah sedaya, amin
Shalawat saha salam ingkang sampun katetepaken dening Allah SWT dhumateng Nabi Agung Muhammad SAW, mugi tansah lumeber dhumateng kaluwarganipun, para sahabat tuwin para pendherekipun ingkang sami stya tuhu, mugi wiwit ndonya dumugi zaman akhir tansah pikantuk syafatipun, amin
Nuwun, wonten ngarsanipun para pepundhen, para sesepuh, para pinisepuh ingkang dhahat pinundhi saha kinabekten
Bapak/ibu/ para kadang duta saraya saking calon kadang besan kinasih ingkang sinuba ing pakurmatan
Miwah sanggya para rawuh kakung-putri, para kadang wredha muda ingkang winantu ing suka basuki
Langkung rumiyen kula nyuwun pangapunten, dene kula ngadeg wonten ngarsa panjenengan sedaya, inggih menika karana mudhi dhawuh saking raka mas ……………….sakaliyan, ingkang ing ari kalenggahan punika, kula kapiji minangka sulih salira talang basa matur wonten ngarsa panjenengan sedaya, namung sakderengipun kula matur, mangga kula dherekaken tansah munjukaken raos puja puji pangastuti syukur wonten ngarsa dalem Allah SWT ingkang sampun paring mapinten-pinten kanugrahan, saha kanikmatan dhumateng kula dalasan panejenengan sedaya, amargi para lenggah sedaya ing ari kalenggahan punika saged rawuh ing griya punika kanthi widada wilujeng kalis ing rubeda.
Awit saking punika kula hangaturaken pambagya wilujeng rawuh panjenengan sedaya. Saha hangaturaken agunging panuwun ingkang tanpa pepindhan, awit rawuh panjenengan sedayaa, langkung-langkung rombongan duta saraya saking calon kadang besan sutrisna. Saking …………………..(alamat) raka mas ……………….. nyuwun pangapunten ingkang sak ageng-agengipun, nglenggana anggenipun nanggapi rawuh panjenengan kirangtanggap lan tangguh,langkung-langkung samangkih anggenipun atur pasugatan papan palenggahan, saha sanes-sanesipun ingkang kirang mranani, tuwin mboten jumbuh kaliyan kalenggaha panjenengan, sepisan malih raka mas ……….nyuwun lumunturing sih samodra pangaksami.
Wasana mawantu-wantu panyuwunipun raka mas ………. Mugi kasekecakna anggenipun lenggah ngantos pari purnaning titi laksana punika. Amin
Minangka panutuping atur, kula nglenggana anggen kula matur kirang tata, kirang suba sita, kirang trapsila, inggih awit kiranging seserepan kula, kula nyuwun lumunturing sih samodra pangaksami, nuwun
Akhirul lisan
Wassalamualaikum wr.wb
