Assalamu’alaikum Wr. Wb.
Kawilujengan saha kabagaswarasan mugya tansah kajiwa kasarira dhumateng panjenengan sedaya dalasan kula.
Ingkang dhahat kinabekten para pepundhen, para sesepuh, para pinisepuh ing Dhusun Krangkungan,
ingkang dhahat kinurmatan Bapak HM. Suprihatin minangka Ketua RW 08 Krangkungan,
ingkang kula kurmati bapak-bapak, ibu-ibu warga RW 08 Krangkungan,
ingkang kula tresnani kadang wredha mudha,
saha sedaya warga RW 08 Krangkungan ingkang satuhu bagya mulya.
Langkung rumiyin sumangga kula dherekaken panjenengan sedaya ngonjukaken raos puji dalasan syukur wonten ngarsanipun Gusti Ingkang Maha Agung, ingkang sampun paring ramat saha hidayahipun dhumateng kita sedaya, satemah wonten ing ri kalenggahan menika kita saged pepanggihan wonten ing papan ngriki kangge ngadani Pengetan Dinten Kartini ing RW 08 Krangkungan kanthi wilujeng nir ing sambekala.
Para rawuh sedaya ingkang satuhu bagya mulya, wonten ing ngriki keparenga kula minangka sesulih saking Dasawisma Melati, nggempil kamardikan panjenengan sedaya kangge ngandharaken sakedhik bab Ibu Kartini, minangka pahlawan estri ingkang misuwur ing nagari Indonesia.
Pengetan dinten Kartini wigatos sanget tumrap bangsa Indonesia. Dinten Kartini dipunpengeti saben taunipun ing tanggal 21 April, amargi Raden Ajeng Kartini miyos wonten ing tanggal menika. Raden Ajeng Kartini misuwur minangka pahlawan pejuang emansipasi tiyang estri. Awit saking perjuangnipun RA. Kartini, para wanita samenika saged nyambut damel sesarengan kaliyan priyayi kakung.
Para lenggah ingkang tansah kula kurmati, Raden Ajeng Kartini menika minangka pangarsa tumrap para wanita, rikala bangsa Indonesia taksih dipunjajah dening bangsa Walandi. RA. Kartini pitados manawi panyengkuyungipun tiyang estri wonten ing pagesangan menika penting sanget. Wonten ing jaman samenika labuh lebetipun RA. Kartini tansah tumanem ing manahipun wanita Indonesia. Menika awit saking kathahipun wanita ingkang saged nyambut damel kados dene para priya ing babagan warni-warni.
Para rawuh ingkang satuhu kinurmatan, ningali saking awrating perjuanganipun RA. Kartini kangge mapanaken tiyang estri supados gadhah drajat ingkang sami kaliyan priyayi kakung, pramila kita sedaya kedah nglajengaken gegayuhanipun Ibu Kartini. Kita sedaya kedah tumut ambangun nagari ingkang adil, makmur, saha rukun, kanthi linambaran jati dhirining wanita Indonesia ingkang prasaja, luhur, saha sadhengah karya.
Makaten kala wau para rawuh sedaya andharan saking kula minangka sulih sarira saking Dasawisma Melati. Mbok bilih anggen kula matur wonten ing ngajeng panjenengan sedaya kathah kiranging atur, subasita, saha tata krama, kula nyuwun rumentahing sih samudra pangaksami.
Maturnuwun,
Wassalamu’alaikum Wr. Wb.
